’دل پر پتھر رکھ کر ایکناتھ شندے کو بنایا گیا وزیر اعلیٰ‘، مہاراشٹر بی جے پی صدر کے بیان سے ہلچل

میڈیا رپورٹس کے مطابق پنویل میں عہدیداروں کی میٹنگ سے خطاب کرتے ہوئے مہاراشٹر صدر چندرکانت پاٹل نے کہا کہ گزشتہ ڈھائی سال کی تصویر دیکھنے کے بعد مہاراشٹر میں حکومت بدلنے کی ضرورت تھی۔ اقتدار میں یہ تبدیلی ہو چکی ہے، اور تبدیلی کے وقت ایک ایسے لیڈر کی ضرورت تھی جو صحیح پیغام دے سکے، اچھے فیصلوں کو استحکام دے سکے۔ ایسے میں مرکزی قیادت نے ایکناتھ شندے کو وزیر اعلیٰ بنانے کا فیصلہ کیا۔‘‘ ساتھ ہی چندرکانت پاٹل کہتے ہیں ’’اس فیصلے سے ہم سبھی افسردہ ہیں۔ وسنت راؤ نائک کے بعد دیویندر فڑنویس لگاتار پانچ سال وزیر اعلیٰ رہے۔ 5 سال وزیر اعلیٰ رہنے کے بعد کسی نے نہیں سوچا تھا کہ مرکز ایسا فیصلہ لے گا۔‘‘

بی جے پی کے ریاستی صدر نے دعویٰ کیا کہ مرکز کے فیصلے کو دیویندر فڑنویس نے دل پر پتھر رکھ کر قبول کیا۔ انھوں نے یہ بھی کہا کہ تمام سیاسی تبدیلیوں کے بعد پارٹی کے لوگ مایوس ہیں، لیکن کسی نے ناراضگی نہیں ظاہر کی، اور یہی پارٹی کی طاقت ہے۔