CAA to be implemented before Lok Sabha elections

نئی دہلی : شہریت ترمیمی قانون (سی اے اے) کو جلد ہی ملک میں نافذ کیا جا سکتا ہے۔ ذرائع نے منگل کو یہ اطلاع دی۔ انہوں نے کہا کہ لوک سبھا انتخابات کے لئے ماڈل کوڈ آف کنڈکٹ جاری ہونے سے پہلے وزارت داخلہ کسی بھی وقت CAA قوانین کو نوٹیفائی کر سکتی ہے۔ سی اے اے کے اصول کے ذریعے افغانستان، پاکستان اور بنگلہ دیش سے ہندوستان آنے والی اقلیتوں کی ہندوستانی شہریت کی درخواستوں کو یقینی بنایا جائے گا۔

CAA کے تحت مرکز کی مودی حکومت بنگلہ دیش، پاکستان اور افغانستان میں ستائے ہوئے غیر مسلم تارکین وطن - ہندو، سکھ، جین، بدھ، پارسی اور عیسائی - جو 31 دسمبر 2014 تک ہندوستان آئے تھے، کو ہندوستانی شہریت فراہم کرنا چاہتی ہے۔

چار سال سے زیادہ کی تاخیر کے بعد سی اے اے کے نفاذ کے لئے قوانین بنائے جانے ضروری ہیں ۔ عہدیداروں نے کہا کہ قوانین تیار ہیں اور آن لائن پورٹل بھی تیار ہے، کیونکہ پوری کارروائی آن لائن ہوگی اور درخواست دہندگان اپنے موبائل فون سے بھی درخواست دے سکتے ہیں۔ درخواست دہندگان کو وہ سال بتانا ہوگا جس میں وہ سفری دستاویزات کے بغیر ہندوستان میں داخل ہوئے تھے۔ درخواست دہندگان سے کوئی دستاویزات نہیں مانگے جائیں گے۔ سی اے اے کو نافذ کرنے کا وعدہ مغربی بنگال میں گزشتہ اسمبلی انتخابات اور لوک سبھا انتخابات میں بی جے پی کا ایک بڑا انتخابی مسئلہ تھا۔

دسمبر 2019 میں پارلیمنٹ کے ذریعہ سی اے اے کی منظوری اور صدارتی منظوری ملنے کے بعد ملک کے کچھ حصوں میں بڑے پیمانے پر مظاہرے ہوئے تھے، جس کے نتیجے میں متعدد اموات ہوئیں۔ آسام میں سب سے پہلے احتجاج 4 دسمبر 2019 کو شروع ہوا، جب یہ بل پارلیمنٹ میں پیش کیا گیا۔ جلد ہی یہ دہلی سمیت بڑے شہروں میں پھیل گیا۔

مظاہروں کے نتیجے میں 27 اموات ہوئیں، جن میں سے 22 صرف اتر پردیش میں ہوئیں۔ ایک ہزار سے زائد افراد کو گرفتار کیا گیا اور مشتعل افراد کے خلاف 300 سے زائد مقدمات درج کیے گئے۔