چکا بلاپور میں جیلیٹن راڈ میں دھماکے سے چھ افراد ہلاک

چکا بلاپور:23 فروری، 2021 (ذرائع)  کرناٹک کے ضلع چکابلاپور میں پتھر کی ایک کان میں رکھی جیلیٹن راڈوں میں پیر کی دیر رات دھماکہ ہونے سے چھ افراد ہلاک ہوگئے ہیں۔ پولیس نے منگل کے روز بتایا کہ کچھ لوگ جلیٹن کی راڈوں کو تباہ کرنے کی کوشش کر رہے تھے، اسی وقت ان میں دھماکہ ہو گیا۔ وزیر اعظم نریندر مودی نے حادثے پر افسوس کا اظہار کیا ہے۔ انہوں نے کہا کہ دھماکے کی وجہ سے ہوئی ہلاکتوں پر وہ دلبرداشتہ ہیں اور سوگوار کنبے سے اظہار تعزیت کرتے ہیں۔ انہوں نے زخمیوں کے جلد صحت یاب ہونے کی دعا بھی کی۔ کرناٹک کے وزیر صحت کے سدھاکر نے جائے وقوع کا دورہ کیا اور کہا کہ ہلاک شدگان کے انسانی اعضا چاروں طرف بکھرے ہوئے تھے۔ پولیس کے مطابق یہ حادثہ پیر اسندرا کے نزدیک ہیرا ناگوالی میں پیش آیا ہے۔ واضح رہے کہ اسی طرح کا ایک دھماکہ 22 جنوری کو ہوا تھا، جب شیوموگا کے ہناسوڈو نامی گاؤں میں جیلیٹن بردار ٹرک میں دھماکہ ہو گیا تھا۔ اس دھماکے میں بھی چھ افراد ہلاک ہوگئے تھے۔ کرناٹک کے وزیر اعلی بی ایس یڈی یورپا نے قصورواروں کے خلاف سخت کارروائی کی یقین دہانی کرائی ہے۔ انہوں نے کہا ہے کہ  ’’چکبالالپور کے ہیرا ناگوالی گاؤں کے نزدیک جیلیٹن دھماکے سے چھ افراد کی موت افسوسناک ہے۔ انہوں نے ضلع انچارج وزیر اور سینئر عہدیداروں کو مکمل تحقیقات کر کے ملزموں کے خلاف سخت کارروائی کی ہدایت دی ہے۔