گیانواپی مسجد کا ہوگا ASI سروے، الہ آباد ہائی کورٹ میں مسلم فریق کی عرضی خارج

پریاگ راج۔  الہ آباد ہائی کورٹ کے چیف جسٹس نے گیانواپی مسجد کے اے ایس آئی کے سروے کے خلاف مسجد انتظامیہ کمیٹی کی طرف سے دائر درخواست پر جمعرات کو اپنا فیصلہ سنایا۔ مسلم فریق کی عرضی کو خارج کرتے ہوئے چیف جسٹس پرتینکر دیواکر کی بنچ نے وارانسی ضلع عدالت کے اے ایس آئی سروے کے حکم کو نافذ کردیا۔ اہم بات یہ ہے کہ 27 جولائی کو سماعت مکمل ہونے کے بعد عدالت نے فیصلہ محفوظ کر لیا تھا۔ مسلم فریق کی مسجد انتظامیہ کمیٹی نے وارانسی کے ضلع جج کے اے ایس آئی سروے کے حکم کو 21 جولائی کو عدالت میں چیلنج کیا تھا۔ فیصلے کے بعد ہندو فریق کے وکیل وشنو شنکر جین نے میڈیا کو بتایا کہ معزز ہائی کورٹ نے مسلم فریق کی عرضی کو خارج کرتے ہوئے وارانسی ڈسٹرکٹ کورٹ کے فیصلے کو مؤثر کر دیا ہے۔ انہوں نے کہا کہ انہوں نے اے ایس آئی کی جانب سے حلف نامہ داخل کیا ہے۔ جس پر عدالت نے کہا کہ اے ایس آئی کے بیان حلفی پر شک کرنے کی کوئی بنیاد نہیں ہے۔ وشنو شنکر جین نے بتایا کہ اے ایس آئی کا سروے آج ہی شروع ہو سکتا ہے۔ اے ایس آئی نے اپنے حلف نامہ میں کہا ہے کہ اگر کھدائی کی ضرورت پڑی تو عدالت سے اجازت لی جائے گی۔