مس کالز موصول ہونے کے بعد تقریباً 50 لاکھ کا ہوا نقصان! آخر کیا ہے معاملہ؟ جانیے مکمل تفصیلات

حالیہ دنوں دہلی میں ایک چونکا دینے والا واقعہ پیش آیا ہے۔ سائبر فراڈ کرنے والوں نے دہلی میں سیکورٹی ایجنسی چلانے والے ایک شخص سے اس کے موبائل فون پر کئی خالی  اور مس کال کر کے تقریباً 50 لاکھ روپے چرا لیے۔ یہ معاملہ سامنے آنے کے بعد جعلسازی کا انوکھا کیس سامنے آیا ہے۔ جس پر ’جتنے منہ اتنی باتیں‘ ہورہی ہیں۔ شمشیر سنگھ  کے نام سے شناخت کیے گئے اس شخص کو 13 نومبر کی شام 7 بجے سے رات 8:44 بجے کے درمیان اپنے سیل فون پر بار بار خالی اور مس کالز موصول ہوئیں۔ جب کہ اس نے کچھ کالوں کو نظر انداز کر دیا، جب اس نے فون اٹھایا تو دوسری طرف سے کسی نے بات نہیں کی۔ تاہم کچھ دیر بعد سنگھ کو ان کے بینک سے پیسے نکالنے کے لیے کئی پیغامات موصول ہونے لگے۔ اسی دوارن صرف ایک مختصر وقت میں اسے اپنی زندگی کا جھٹکا لگا کیونکہ ریئل ٹائم گراس سیٹلمنٹ (RTGS) یعنی فوری فنڈ ٹرانسفر کے ذریعے اس کے اکاؤنٹ سے تقریباً نصف کروڑ نکال لیے گئے تھے۔