متحدہ عرب امارات کے دارلخلافہ ابوظہبی میں لاپروائی سے سڑک پار کرنے والے 50 ہزار سے زائد افراد پر جرمانہ عائد کیا گیا۔ اماراتی میڈیا کے مطابق پولیس نے بے احتیاطی سے سڑک عبور کرنے والوں کی تعداد کا اعلان کرتے ہوئے بتایا کہ گزشتہ سال 50 ہزار 700 شہریوں کو پیدل سڑک پارکرنے میں لاپرواہی برتنے پر فی کس 400 درھم جرمانہ عائد کیا گیا ان افراد نے پیدل سڑک پار کرنے کے لیے غیر مختص جگہ استعمال کی۔ پولیس کا کہنا ہے کہ گزشتہ سال ٹریفک حادثات کی بڑی وجہ پیدل چلنے والوں کی طرف سے سڑک عبور کرنے میں احتیاط نہ برتنا ہے۔ ایک سال میں گاڑیوں کی ٹکر سے 50 سے زائد پیدل چلنے والے شہری ہلاک ہو چکے ہیں۔ واضح رہے کہ ابوظہبی پولیس کے سادہ لباس اہلکار سڑکوں پر پیدل چلنے والے افراد پر نظر رکھتے ہیں اور جیسے ہی کوئی شخص بے احتیاطی سے سڑک پار کرتا ہے تو اسے موقع پر ہی جرمانہ کردیا جاتا ہے۔ پولیس نے حادثات سے بچنے کے لیے شہریوں کو سڑک پار کرنے میں احتیاط کرنے اور ذمہ داری کا مظاہرہ کرتے ہوئے موبائل فون استعمال کرنے سے گریز کرنے کی بھی ہدایت دی ہے۔