بینگلورو میں پرائیویٹ اسپتال نے تھمایا کورونا مریض کو 5 لاکھ کا بل، ریاستی وزیر ناراض
04:21PM Thu 30 Jul, 2020
کرناٹک میں کورونا انفیکشن کے بڑھتے اثرات کے درمیان ایک پرائیویٹ اسپتال کے ذریعہ کووڈ-19 مریض کو من مانہ بل تھمانے کا معاملہ منظرعام پر آیا ہے۔ بتایا جا رہا ہے کہ بنگلورو واقع پرائیویٹ اسپتال نے 64 سالہ ایک مریض کو 5 لاکھ روپے کا بل دیا جس کا علاج گزشتہ 3 جولائی سے چل رہا ہے۔ اس تعلق سے جب سوشل میڈیا پر اسپتال کی تنقید شروع ہو گئی تو خبر ریاست کے میڈیکل ایجوکیشن وزیر تک پہنچی اور انھوں نے اس پر سخت اعتراض کیا۔ انھوں نے فوری رد عمل ظاہر کرتے ہوئے کہا کہ وہ اسپتال کے خلاف کارروائی کریں گے۔
میڈیکل ایجوکیشن وزیر ڈاکٹر کے. سدھاکر نے واقعہ کی تفصیل جاننے کے بعد اپنے ٹوئٹر ہینڈل پر ایک بل پوسٹ کیا ہے جس میں انھوں نے اپولو اسپتالوں کے بل پوسٹ کیے ہیں اور کہا ہے کہ اسپتال حکومت کی ہدایات اور تنبیہ کی مبینہ طور پر خلاف ورزی کر رہا ہے۔ قابل ذکر ہے کہ ڈاکٹر سدھاکر ریاست میں کووڈ-19 مینجمنٹ کے انچارج بھی ہیں اور انھوں نے واضح لفظوں میں کہا ہے کہ جو اسپتال حکومت کی ہدایات پر عمل نہیں کر رہے ہیں اس کے خلاف کارروائی ضرور ہوگی۔
ڈاکٹر سدھاکر نے اپنے ایک بیان میں کہا ہے کہ "مجھے معلوم ہوا ہے کہ اپولو اسپتالوں میں مریضوں کو کافی دقتیں ہو رہی ہیں۔ میں نے اس سلسلے میں کئی بار آگاہ کیا ہے۔" دراصل حکومت نے پرائیویٹ اسپتالوں میں علاج کرانے والے کووڈ-19 مریضوں کے لیے ایک دن میں 5 ہزار روپے سے 15000 روپے تک کی فیس طے کی ہے۔ جب اس سلسلے میں اپولو اسپتال سے سوال کیا گیا تو ایک افسر نے بتایا "وزیر محترم کو کچھ غلط فہمی ہو گئی ہے۔ ہمارے مینجمنٹ نے انھیں تفصیلی جانکاری دے دی ہے۔"ಬೆಂಗಳೂರಿನ ಶೇಷಾದ್ರಿಪುರಂ ಅಪೋಲೋ ಆಸ್ಪತ್ರೆಯಿಂದ ಸಾರ್ವಜನಿಕರಿಗೆ ಹೆಚ್ಚು ತೊಂದರೆಯಾಗ್ತಿದೆ ಎಂದು ತಿಳಿದು ಬಂದಿದೆ. ಈಗಾಗಲೇ ಅನೇಕ ಬಾರಿ ಆ ಆಸ್ಪತ್ರೆಗೆ ವಾರ್ನ್ ಮಾಡಿದ್ದೇನೆ. ಆದರೂ ಇಂದು ಕೊರೊನಾ ರೋಗಿಗೆ 5 ಲಕ್ಷ ಬಿಲ್ ಮಾಡಿದ್ದಾರೆ ಎನ್ನುವ ಸುದ್ದಿ ಕೇಳಿ ಆಘಾತವಾಯಿತು 1/2 pic.twitter.com/hoWD1JRfxU
— Dr Sudhakar K (@mla_sudhakar) July 29, 2020
اسپتال نے کووڈ-19 مریض کو 5 لاکھ روپے کا بل تھمائے جانے سے متعلق خبر رساں ادارہ پی ٹی آئی کو بتایا کہ 64 سالہ مریض کو گزشتہ 3 جولائی کو آئی سی یو میں داخل کرایا گیا اور وہ آئی سی یو میں ہیں۔ ان کا بل بیمہ فیس کے مطابق بنایا گیا ہے۔ اسپتال کے کارگزار افسر کا کہنا ہے کہ "مریض کے گھر والوں کو بل سے کوئی دقت نہیں ہے، بلکہ مریض کا بیٹا بھی میڈیکل سیکٹر میں ہے اور وہ حالات کو بہت اچھی طرح سمجھتا ہے۔"Letter from Apollo sheshadripuram branch. pic.twitter.com/Rxij742Nuq
— Dr Sudhakar K (@mla_sudhakar) July 29, 2020
اس تعلق سے میڈیا میں مریض کے بیٹے کا بیان بھی سامنے آیا ہے۔ اس کا کہنا ہے کہ وہ فی الحال کوئی تبصرہ نہیں کرنا چاہتا کیونکہ مریض اب بھی اسپتال میں ہے۔ مریض کے بیٹے نے یہ بھی کہا کہ "ہماری ترجیح یہ ہے کہ والد پوری طرح صحت یاب ہو کر اسپتال سے ڈسچارج ہو جائیں۔ اس وقت میں معاملے پر اپنا رد عمل ظاہر کر کے کسی الجھن میں نہیں پڑنا چاہتا۔"
Photos
