چار دنوں تک سرکاری اسپتال کے لفٹ میں پھنسی رہی خاتون، ایسے جیتی موت سے جنگ

نئی دہلی : مغربی بنگال (West Bengal) کی راجدھانی کولکاتہ (Kolkata) کے سرکاری اسپتال نیل رتن اسپتال کی لفٹ میں ایک خاتون چار دنوں تک پھنسی رہی اور کسی کو خبر تک نہیں ہوئی ۔ لفٹ میں پھنسے رہنے کے دوران خاتون کافی چیخی ، لیکن کسی نے اس کی آواز نہیں سنی ۔ خاتون نے تو اپنے زندہ رہنے کی امید بھی چھوڑ دی تھی ۔ حالانکہ اسپتال انتظامیہ کے پاس اس واقعہ کے بارے میں کوئی بھی جانکاری نہیں ہے ۔ لفٹ میں اپنے چار دنوں کے دوران خاتون کے پاس واحد سہارا پانی کی 300 ملی لیٹر کی بوتل تھی ۔ پیر کے روز 60 سالہ آنویارا بی بی این آر ایس اسپتال (NRS Hospital) کی او پی ڈی میں ڈاکٹر کو دکھانے کیلئے آئی تھیں اور انہیں چوتھی منزل پر جانا تھا ۔ پاوں میں درد کی وجہ سے انہوں نے لفٹ استعمال کرنے کا سوچا ۔ ایک بڑی لفٹ تھی اور ایک چھوٹی ۔ خاتون چھوٹی لفٹ میں چڑھ گئی ، لیکن دوسری منزل کے قریب لفٹ بند ہوگئی اور وہ پیر سے جمعہ یعنی لگاتار چار دنوں تک لفٹ میں قید رہی یا یوں کہیں کہ یہ چار دن وہ زندگی اور موت کی جنگ لڑتی رہیں ۔ بنگلہ اخبار گنشکتی میں شائع ایک خبر کے مطابق بادوڑیا کے گاؤں چانڈی پور کی رہنے والی آنویارا بی بی نے بتایا کہ لفٹ میں پھنسنے کے بعد وہ کافی چیخی ، لیکن کسی نے ان کی آواز نہیں سنی ۔ خاتون نے بتایا کہ میرے پاس پانی کی بوتل اور ایک چوڑا کا پیکٹ تھا ۔ ہر روز وہ تھوڑا سا چوڑا کھاکر پانی پیتی تھی اور سوچتی کہ کب کوئی آئے گا اور دروازہ کھولے گا ، لیکن ایسا نہیں ہوا ۔ جب خاتون چار دنوں تک گھر نہیں پہنچی تو گھر والے اس کی تلاش میں نکل پڑے۔ وہ اسپتال پہنچے، لیکن وہ وہاں نہیں ملی ۔ اس کے بعد جمعہ کو ان کا ایک جاننے والا اسپتال پہنچا ، جہاں اس کو لفٹ سے آرہی ایک خاتون کی آواز سنائی دی ۔ پھر کیا تھا ، اس کے فوراً بعد دوسرے لوگوں کو بلایا گیا اور خاتون کو وہاں سے بحفاظت باہر نکالا گیا ۔ تاہم چار دن تک اندھیرے میں رہنے کی وجہ سے خاتون کافی خوفزدہ تھی ۔ دوسری جانب میڈیا رپورٹس کے مطابق اسپتال انتظامیہ نے بتایا کہ اس کو اس واقعہ کے بارے میں معلوم نہیں ہے ۔