ستیہ نکیتن میں اچانک گری 3 منزلہ عمارت، 5 مزدوروں کے پھنسے ہونے کا اندیشہ

نئی دہلی : راجدھانی دہلی میں ایک تین منزلہ عمارت کے گرنے کی خبر ہے۔ دہلی کے ستیہ نکیتن کے قریب ایک عمارت اس وقت گر گئی جب تزئین کاری کا کام چل رہا  تھا۔ یہ عمارت تین منزلہ بتائی جارہی ہے۔ بتایا جا رہا ہے کہ جس وقت یہ عمارت گری اس وقت پانچ مزدور موقع پر کام کر رہے تھے۔ ایسے میں ان سب کے دبے ہونے کا اندیشہ ہے ۔ فائر ڈپارٹمنٹ نے بتایا کہ جو عمارت گر گئی ہے ، وہ تین منزلہ ہے اور اس کی تزئین کاری کا کام جاری ہے۔ ریسکیو آپریشن کے لیے ٹیمیں موقع پر موجود ہیں اور ملبے تلے دبے افراد کو نکالنے کی کوششیں جاری ہیں۔ دہلی فائر سروس نے بتایا کہ فائر ٹینڈرز کی 6 گاڑیاں بھی جائے واقعہ پر موجود ہیں۔ اس واقعہ کی اطلاع انہیں دوپہر ڈیڑھ بجے کے قریب ملی، جس میں بتایا گیا کہ ملبے کے نیچے پانچ مزدور پھنس گئے ہیں ۔