سعودی عرب میں جنرل ڈائرکٹریٹ آف پاسپورٹس نے حال ہی میں بھرتی کی جانے والی 290 خواتین پولیس اہل کاروں کے تربیتی پروگرام کے پہلے مرحلے کا آغاز کر دیا ہے۔ بائیس ذو الحجہ سے شروع ہونے والا یہ پروگرام مملکت کے 9 صوبوں میں منعقد کیا جا رہا ہے۔ یہ صوبے مکہ مکرمہ، مدینہ منورہ، ریاض، الشرقیہ، تبوک، الجوف، القصیم، عسیر اور شمالی حدود ہیں۔ پاسپورٹ ٹریننگ سینٹر کی نگرانی میں جاری تربیت کا پہلا مرحلہ دو ہفتے پر مشتمل ہے۔ سعودی سرکاری خبر رساں ایجنسی SPA پر جاری ایک بیان میں جنرل ڈائریکٹر پاسپورٹس سلیمان بن عبدالعزیز نے بتایا کہ یہ پروگرام مملکت کی سطح پر پہلی مرتبہ منعقد کیا جا رہا ہے۔ اس دوران تربیت حاصل کرنے والی خواتین اہل کاروں کو اس محکمے کی کارروائیوں اور دستاویزات کی جانچ کے طریقوں سے متعارف کرایا جائے گا۔ مزید برآں عسکری اور سکیورٹی کلچر اور عوام کے ساتھ معاملات اور ملازمتی برتاؤ کے بارے میں بھی آگاہ کیا جائے گا۔ جنرل ڈائریکٹر کے مطابق خواتین اہل کاروں کو اگلے مرحلے میں جانے کے لیے ہر موجودہ مرحلے میں کامیاب ہونا ہو گا۔