’’ترکی و شام کے متأثرین کی بھر پور مدد کریں اور توبہ و استغفار کا اہتمام کریں‘‘: صدر آل انڈیا مسلم پرسنل لا بورڈ کی اپیل

نئی دہلی: 8 فروری،2023  (پریس ریلیز) دوروزقبل ترکی و شام میں آنے والے زلزلہ نے پوری انسانی برادری کو ہلاکررکھ دیا، واقعہ انتہائی المناک، غم انگیز اور تڑپا دینے والا ہے، جس میں ہزاروں نوجوان، بوڑھے، بچے، مرد اور عورتیں لمحوں میں تہِ خاک دفن ہوگئے۔ فلک بوس، خوبصورت اور شاندار عمارتیں پلک جھپکتے ہی زمین پر آپڑیں، اس موقع پر ترکی اور شام کے پریشان حال لوگوں کی مدد کرنا پورے سماج کا انسانی فریضہ ہے، ہمارے وطن عزیز ہندوستان کے بشمول مختلف ملکوں نے متأثرین کی طرف مدد کا جو ہاتھ بڑھایا ہے وہ بہت ہی لائق تحسین ہے۔ اس موقع پر آل انڈیا مسلم پرسنل لا بورڈ  کے صدر حضرت مولانا سید محمد رابع حسنی ندوی نے تمام مسلمانوں سے اپیل کی ہے کہ وہ فراخ دلی کے ساتھ متأثرین کی مدد کریں، ملک کی جو معتبر تنظیمیں ریلیف کے لیے کام کررہی ہیں، ان کے ذریعہ اپنی مدد پہنچائیں اور  مسلمان اس حقیقت کو یاد رکھیں کہ دنیا میں جو بھی حالات پیش آتے ہیں، وہ سب اللہ کی مرضی سے پیش آتے ہیں۔ انہوں نے توبہ و استغفار کرنے او ر دعاؤں کا اہتمام کرنے کی بھی گذارش کی ہے۔