کل پورے ہندوستان میں سال کا پہلا مکمل چاند گرہن؛ بھٹکل میں 06:59 کے بعد دیکھا جاسکے گا سوپر بلڈ بلیو مون

بھٹکلیس نیوز / 30 جنوری، 18 بھٹکل   / (بھٹکلیس نیوز بیورو) جنوری کی اکتیس تاریخ یعنی کل ہندوستان سمیت پوری دنیا میں چاند گرہن کا یادگاراور دلفریب واقعہ رونما ہوگا جسے ماہرین ’سپر بلڈ بلیو مون‘ سے تعبیر کر رہے ہیں۔ گزشتہ 150 سال میں ایسا واقعہ کبھی رونما نہیں ہوا اور بدھ کے روز مغربی شمالی امریکہ، ایشیا، مشرقِ وسطیٰ اور روس کے علاقوں میں دیکھا جاسکے گا۔ اس مکمل چاند گرہن کی خاص بات یہ ہے کہ ایک جانب تو یہ مکمل چاند یعنی ’’بدر‘‘ ہوگا۔ دوم یہ سپرمون بھی ہے یعنی عام حالات کے مقابلے میں یہ 14 فیصد بڑا دکھائی دے گا اور اس پر چاند کو گرہن لگنے کا منظر ایک دلفریب نظارہ پیش کرے گا۔ اس دوران زمین کا سایہ چاند پر پڑنے سے اس کی رنگت سرخی مائل دکھائی دے گی۔ ان تمام مظاہر کی بنیاد پر اسے ’’سپر بلیو بلڈ مون‘‘ کا نام دیا گیا ہے۔ تاریخی لحاظ سے 1866 میں ایسا نظارہ دیکھا گیا تھا۔ بھٹکل کے شائقین اس  سپربلیومون کے چاند گرہن کو 06:59 بجے دیکھ سکیں گے تین گھنٹے اور 12/منٹ تک جاری رہ کر 09:38 بجے ختم ہوگا۔ اگرچہ یہ عمل پہلے ہی شروع ہوچکا ہوگا لیکن اس وقت چاند افق سے نیچے ہوگا اور دکھائی نہیں دے سکے گا۔ تاہم 6 بج کر 59 منٹ پر چاند پورے گرہن کی حالت میں ہوگا اورسات بج کر37 منٹ پر گرہن اترنا شروع ہوگا اور قریباً ساڑھے نو بجے تک مکمل طور پر ختم ہوجائے گا۔